نيدفيد كواليتي يليق بالأهلي
ناس كتير بتنتقد كريم نيدفيد علي أداؤه في مباراة الأمس ، لكن بحسابات الجاهزيه الفنيه والبدنيه وإبتعاده لفتره طويله عن الملعب وكذلك الظروف اللي أحاطت بالمباراه قبل بدايتها بشوف إن أداؤه طبيعي جدا .
خاصة إنها مباراته الإولي منذ فتره بعيده وكمان كانت بتتلعب خارج مصر في ملعب وظروف سيئه ، أما من الناحيه الفنيه نيدفيد كان بيلعب مركز 𝟔 وهو أصلا لاعب بيجيد أكتر في مركز 𝟖 ورغم ذلك نجح في فتك الكره وإفساد أكتر من هجمه لفريقي ميدياما الغاني .
بالإضافه إن كولر لعب مباراة الأمس بتوليفه مختلفه للاعبي خط الوسط وطبيعي معدل الإنسجام ميكونش في أعلي مستوياته ، ولو ركزنا في التفاصيل أكتر هنلاقي إن اللاعب كان محمل نفسه بأعباء نفسيه كبيره لأنه عنده الرغبه يرجع للصوره وده وضح جدا في الإنذار اللي أخده بدون داعي وإنفعاله المبالغ فيه وأكتمل الأمر بإصابته وتغييره .
عشان كده بشوف إن اللاعب يحتاج للمسانده والدعم أكتر بكتير من النقد لأنه لاعيب يملك قدرات فنيه وبدنيه كبيره وبالبلدي كده متجرب قبل كده ولو ساعدناه يرجع لفورمته المعتاده هنكون كسبنا لاعيب مميز في خط وسط الأهلي
ونفس الأمر ينطبق علي أكرم توفيق ( موفاسا ) قلب الأسد ولا نسينا ؟! أكرم اللي تعرض لهجمه شرسه غير مبرره عقب مباراة بلوزداد لضعف أداؤه في المباراه رغم إنه أيضا مازال يتحسس خطواته الإولي بعد فترة غياب طويله وإصابه صعبه .
يا جماعة الخير لازم نتعلم إمتي ندعم اللاعب وإمتي ننتقده ونكون أكتر موضوعيه في الطرح ، يعني مفيش ما يمنع ننتقد اللاعب في المباراه خلال 𝟗𝟎 دقيقه لكن لا داعي للحديث عن عدم إفادته للفريق ووجوبية رحيله وما إلي آخره من الآراء الغاضبه التي تتباين من مباراه إلي آخري بل من شوط إلي آخر وباص وآخر .
في النهايه أعلنها بكل بوضوح إني متعاطف مع نيدفيد وأثق في معدنه وقدرته علي العوده لفورمته ، أما أكرم أنا مش قلقان عليه غير من القوه الزايده اللي بيلعب بيها لكن فيما يتعلق بالفورمه الفنيه يظل رهاني عليه طول الوقت
