العامري فاروق ولعنة اللايك والشير
قبل ظهور السوشيال ميديا كانت المطبوعات الورقية هي الوسيلة الأهم لنقل الأخبار….يعني لو عاوز تعرف أخبار السياسة، الرياضة، الفن أو الاقتصاد فأنت محتاج تشتري كل يوم جرايد ومجلات (ده غير الكتب)
طبعا مع زيادة عدد المطبوعات الكل كان بيدور على السبق الصحفي اللي يميز المطبوعة عن غيرها وفي شهوة البحث عن سبق صحفي ياما انضربت أخبار أونطة وياما طلع إشاعات عن مشاهير لحد لما الناس ابتدت تفقد الثقة في الجرايد وظهرت مقولة ياعم ده كلام جرايد على أي كلام غير موثوق من صحته
بمرور الوقت ظهرت المجلات المتخصصة ودي مجلات محتاجة مجهود أكبر لأنك محتاج تملى صفحات المجلة بمقالات وأخبار عن مجال واحد ولأن الأخبار محدودة (خصوصا للمجلات الغير تابعة لمؤسسات كبيرة) كان الحل السهل هو جو الإثارة وفبركة الأخبار ونشر الإشاعات لحد لما وصلنا للمرحلة الأسوأ مع ظهور الإنترنت ومواقع التواصل الاجتماعي
في عصر السوشيال ميديا أصبح عندنا 𝟏𝟐𝟎 مليون صحفي وأي حد عمل حساب على فيس بوك أو 𝐗 بقا صحفي ومهتم إنه ينزل أخبار وحصريات.
طب معلش دلوقتي حضرتك لا صحفي ولا لك مصادر ولا تعرف حد وممكن كمان تكون في محافظة بعيدة وعمرك لا شوفت صحفي أو لاعب أو حد مشهور لأنك مطلعتش بره محافظتك إيه بقا مصادرك اللي على أساسها بتنشر أخبار؟
كمان الخبر الأونطة في ظرف دقايق الكل بينقله سواء بتشييره من صفحات أوبنقله على أساس إني اقول انا حد من العالمين ببواطن الأمور وكل ده بدون مراعاة إنك ممكن تأذي ناس بخبر مغلوط
من يومين حد نشر خبر وفاة الأستاذ العامري فاروق وفي خلال دقايق السوشيال ميديا كلها كانت نقلت الخبر ومصر كلها بتتكلم عن وفاة الرجل وفي الآخر أخو العامري بنفسه طلع نفى الخبر
حط نفسك مكان أسرة العامري فاروق وأبوك أو اخوك في المستشفي في حالة خطيرة وانت أعصابك متدمرة وفجأة تلاقي اتصالات من أصدقاء وأقارب بيعزوك في اخوك اللي نايم قدامك على سرير المرض بتتمنى له يقوم بالسلامة وصحفيين بيسألوك عن معاد الدفنة!!
أنتوا إزاي قلوبكم مفيهاش رحمة كده؟! معقول شهوة اللايك والشير وصلتكم للمرحلة دي؟!
ياعم والله انت ماصحفي ولا هتبقى صحفي فخليك في شغلك اللي بتفهم فيه وكلامي للناس اللي بتعيد نشر الكلام ده عن طريق الشير حضرتك محاسب قدام ربنا عن مدى صحة الكلام اللي انت بتشيره ومش معنى إنك عامل شير إنك بتخلي مسؤوليتك قدام ربنا واستنى ياعم لحد لما الخبر يتعلن رسميا من أصحابه وتذكر دائما قول المولى عز وجل ﴿ يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ﴾
صدق الله العظيم
