المدير الرياضي والصفقه الأهم
عارفين إيه أهم صفقه نفسي فيها حاليا ؟ مش المهاجم ولا السيرد باك ولا الباك ليفت ولا أي مركز في الملعب ، طيب أمال إيه ؟
نفسي في صفقة المدير الرياضي ، بس مدير رياضي بجد يعني بالمفهوم الصحيح ليه ( الأوروبي مش المصري )، طيب وليه المدير الرياضي ؟
لأن المدير الرياضي هو من يدير شئون كرة القدم داخل النادي من علي الأرض تنفيذا لرؤية مجلس الإداره .
وهو رجل يجب أن يكون مؤهلا أي بيملك خلفيه فنيه وقدره تسويقيه وتعاقديه وكمان ماليه يعني تقريبا إداره كامله مصغره .
وهذا الرجل هو من سيقوم بإختيار أدواته سواء علي مستوي فريق إسكويتنج أو فريق تعاقدات أو تسويق أو حتي الإجهزه الفنيه وكل ذلك بالتنسيق مع المجلس لأنه يعد حلقة الوصل بين المجلس وقطاع كرة القدم .
طيب ليه أنا أكدت علي المفهوم الأوروبي مش المصري ؟ لأن مع إحترامي عندنا في مصر العديد من أصحاب هذا اللقب لا يدركون دوره الحقيقي وبالتالي لا يقومون به ( يعني تقدر تقول إنه مجرد إسم جديد لمدير الكره).
ولازم ناخد في الإعتبار إن العالم كله ماشي كده وأكبر الأنديه عندها مدير رياضي وبيملكوا مجالس إدارات وأجهزه فنيه وإداريه علي أعلي مستوي ولا تعارض في ذلك وهناك بعض التجارب الملهمه مثل تجربة مونشي مع أشبيليه الأسباني .
والحقيقه لا يليق بالأهلي صاحب الرياده في أفريقيا أن يسبقه نادي في أمر مهم زي ده وهو نادي صن داونز اللي بنضرب بتجربته المثل دون دراسة الأسباب وصن داونز سبق وتعاقد مع المدير الرياضي السابق لتشيلسي وكمان شوفنا إن ماكوينا المدير الفني معاه فريق من محللي الأداء.
أخيرا عشان ممكن حد يتبني رأي ويقولي مهو ده دور شركة الكوره !! هرد وأقوله أنا بتكلم علي الدور الإداري والميداني علي الأرض في نفس الوقت وده لسه مش ملموس بالنسبالي من شركة الكوره حتي اللحظه دي وعشان كده هفضل أنادي بوجود مدير رياضي أو أيا من يقوم بأدواره المتعدده والمركبه تحت أي مسمي .
كرة القدم بقت صناعه وعلم والمدير الرياضي قضيه سأظل أتبناها و أنادي بيها إلي أن تحدث يوما ما أو يتم تحقيق أدوارها بأي شكل من الأشكال
