تبادل الزيارات و القضاء على التعصب
مش عارف اجيبها لكم ازاي بس كل المشاعر والكلام الحلو ده هينتهي مع أول ماتش يجمع الفريقين أو مع أقرب موسم انتقالات
الكلام ده بشوفه من الثمانينات من أيام لما كانت جماهير الزمالك بتحضر ماتشات الأهلي الإفريقية وتقعد في مدرجات الأهلي بالأعلام البيضا والعكس في ماتشات الزمالك بس كل ده لمجرد محاولات تهدئة الأجواء مش أكتر
مفيش أكتر من الفترة اللي بعد حادثة بورسعيد والدفاع الجوي لما جماهير الأهلي كانت بتهتف لشيكابالا وجماهير الزمالك كانت بتهتف لتريكة أو بعد فوز المنتخب ببطولة إفريقيا ودي أوقات كنت تحس فيها إن خلاص مبقاش فيه أهلي وزمالك.
على فكرة الكرة أصلا من غير تعصب لفريق معين ملهاش طعم وكده انت ممكن تتفرج على تنس أو جمباز إيقاعي لكن متعة الكرة في انتماءك لنادي تشجعه لكن بعيدا عن التجاوز والخروج على النص
القيمة في تبادل الزيارات بين مجلسي الأهلي والزمالك إنه بييجي بعد فترة كارثية من حكم مرتضى منصور للزمالك، الفترة اللي شهدت تجاوزات غير مسبوقة في تاريخ الرياضة المصرية والعالمية من خوض في الأعراض واتهامات مستمرة في الذمم واللي كان له انعكاس سئ على الجمهور وتابعنا ده كلنا على السوشيال ميديا وفي بعض القنوات من خلال لاعبين سابقين لم يحققوا أي نجاح كلاعبين فقرروا يعوضوا ده من خلال ترديد نفس كلام رئيس الزمالك السابق
هيفضل فيه تحفيل وبرضو هيكون فيه تجاوزات بس كل اللي نتمناه إن صوت العقل يحكم والتجاوزات دي متكونش هي القاعدة وإن صوت العقل هو اللي يحكم
