مرتضى فكرة و الفكرة لا تموت
بعد أن استبشر الجميع زملكاوية قبل أهلاوية خيرا باختفاء مرتضى منصور من المشهد واضح إن الكابتن أحمد سليمان محبش يحرمنا من الجو اللي كان عامله مرتضى
تصريحات أقل ماتوصف بيه إنها تصريحات غير مسؤولة من لاعب الأهلي السابق والزمالك الحالي ناصر ماهر كلها تطبيل للزمالك وده اللي احنا متعودين عليه من كل اللاعبين المصريين المنتقلين لأندية جديدة لكن اللي مش مقبول هو التقليل من نادي بحجم الأهلي ولعيبته وجمهوره وإدارته
توقعنا في ظل إدارة جديدة إنه يتم عقاب اللاعب من قبل ناديه الجديد لكن اللي حصل هو هجوم على مقدم البرامج اللي انتقد التصريحات دي رغم إنه معرف بانتمائه للزمالك
المشكلة الأكبر في البوست اللي كتبه سليمان إنه استخدم نفس مفردات مرتضى منصور اللي سليمان نفسه كان بينتقدها…
يعني انا لحد دلوقتي مش فاهم يعني إيه لو مش عاجبك قناة أون تايم سبورت تعالي نشغلك في الزمالك؟ وفين التركيز اللي مع نادي الزمالك أصلا؟
تصريحات مثيرة للجدل مصر كلها اتكلمت عنها وكل البرامج والصفحات أهلاوية وزمالكاوية اتكلمت عنها، اشمعنا انت ركزت مع ابراهيم؟
بعدين دي مش أخبار الزمالك، لأنه مطلعش قال فلان من لعيبة الزمالك ضرب فلان ولا قال عضو مجلس إدارة الزمالك عمل وسوى، انت اللاعب بتاعك طلع حلقة كاملة من الطخ بوم لمجرد إنه يغازل جمهور الزمالك وأي حلقة بالشكل ده طبيعي الناس تعلق عليها زي ماعلقت على حلقة حسام عاشور وزي ماهتعلق على أي حلقة يكون فيها تصريحات بالشكل ده.
كان أولى بيك ياكابتن أحمد بدل ماتقول لإبراهيم عبدالجواد ميركزش مع الزمالك تقول لناصر ماهر يركز مع فريقه وميطلعش يثير الجدل من قبل حتى ماينزل الملعب ويلبس تيشيرت الزمالك وانت كمان تركز علشان الدوري 𝟏𝟖 فريق مش 𝟏𝟔 زي انت ماذكرت
