لقطات من مباراة مصر و الرأس الأخضر
في واحدة من السيناريوهات المجنونة لكرة القدم منتخب مصر يصعد للدور الثاني من كأس الأمم الإفريقية بعد التعادل مع كاب فيردي
للمباراة الثالثة على التوالي منتخب مصر يحقق نفس النتيجة بالتعادل 𝟐/𝟐 وللمرة الأولى في تاريخه بيصعد للدور الثاني ب𝟑 نقاط فقط
فيتوريا الوحيد في مصر اللي كان مقتنع بوجود محمد النني في التشكيل الأساسي لكن باستبداله النهارده بينطرح السؤال هو ازاي مروان عطية يخرج من التشكيل أو يقعد احتياطي لأي حد في مصر؟!
نفس الكلام بالنسبة لتريزيجيه نجم المنتخب الأول في آخر 𝟕 سنين واللي مش فاهمين برضو إزاي ممكن يقعد احتياطي؟!
سيطرة مصرية على الشوط الأول وهدف معتاد عكس سير المباراة في نهاية الشوط الأول من خطأ دفاعي ساذج
مفيش فريق بطل يدخل فيه 𝟔 أهداف في الدور التمهيدي… أداء كارثي لخط دفاع المنتخب ولحارس مرماه اللي بيقدم أسوأ مستوياته في الكان وأداء هجومي جيد
شوط أول من الولا حاجة لإمام عاشور وأحمد فتوح اللي بيتم استبداله بمحمد حمدي اللي مبيقدمش جديد وفوقان إمام في الشوط الثاني
تغييرة تريزيجيه بتقلب المباراة.. تريزيجيه بيسجل ويهدد ويصنع، تريزيجيه حرفيا بيطلع نار من بؤه
أداء جيد من محمد هاني وعلامات استفهام على أداء زيزو اللي لسه عنده أكتر من كده
أسوأ مباريات عمر مرموش على الإطلاق وأقل مباريات مصطفي محمد باستثناء هدف عالمي بيسجله في الوقت المحتسب بدل الضائع
بعد الهدف كان مفترض إن الماتش خلص لكن الفار مصمم يلعب بأعصابنا رغم إن الكرة واضحة جدا
الإثارة مبتنتهيش باحتساب الهدف علشان بعد الهدف كاب فيردي بيسجل هدف التعادل من لعبة ساذجة وتعامل ولا أسوأ من محمد الشناوي اللي بيخرج مصاب
بعد التعادل وفي قمة الإحباط الكابتن علي محمد علي اللي آخر نتيجة قالها كانت إن غانا كسبانة موزمبيق 𝟐/𝟎 وإن غانا صعدت بيقول لنا إن مبروك موزمبيق سجلت جولين والماتش خلص تعادل ومصر صعدت تاني بس هو معذور طبعا لأنه كان مشغول بالمعلومات بتاعة عدد سكان كاب فيردي وكاب فيردي بتتنطق إيه بالعربي والانجليزي والفرنساوي البرتغالي وحصة الجغرافيا اللي كانت شغالة
مليون مبروك للمنتخب المصري وبالتوفيق في القادم إن شاء الله
