محمد صلاح في مرمى نيران النقد
قبل ساعات على انطلاق مباراة مصر المصيرية أمام كاب فيردي محمد صلاح يثير الجدل من جديد والمدير الفني الألماني لناديه ليفربول يعلن سفر صلاح لاستكمال علاجه في إنجلترا.
بعد مباراتين ولا أسوأ لصلاح ومع السخط الجماهيري على المحترف المصري صلاح بيزيد الطين بلة وفي خرق للوائح المنظمة صلاح ببقرر السفر لانجلترا وترك المنتخب.
بداية دعونا نتفق إن أسوأ مافي الموضوع نقطتين
الأولى إعلان الخبر من ليفربول
مفيش منطق يقول إن اللي يعلن عن سفر صلاح يكون ناديه لأن ناديه هنا ملوش علاقة واللاعب رسميا على ذمة المنتخب فمنطقي إن اللي يعلن يكون إتحاد الكرة اللي واضح جدا إنه اتفاجئ زينا ولحفظ ماء الوجه نزل بيان يعدها بساعتين بنفس المعني
توقيت الإعلان
الإعلان في نفس يوم مباراة تحديد مصير زي مباراة كاب فيردي كان من الممكن أن يكون مبرر في حال سفر اللاعب قبل الماتش لأنك كده كده مش هتقدر تخبيه لكن طالما منتظر لبعد الماتش وهتحضره في الملعب يبقا إيه الداعي من التسرع؟
أنت في كل الأحوال هتحضر الماتش، كسبنا هنعلن إنك مسافر والناس كده كده هتكون ملخومة في الفرحة ومفيش حد هيركز، خسرنا يبقا خلاص ياعم كلنا مروحين ومش انت بس اللي هتسافر.
نقطة ثالثة هو انت ليه أصلاً تسافر وتسيب المنتخب اللي انت حاربت علشان تكون القائد بتاعه؟ وليه أصلاً تتعالج في إنجلترا ومدربك بيقول لو المنتخب صعد للنهائي هترجع؟ طب وانا لو صعدت للنهائي من غيرك يبقا انت لزمتك إيه وانت سبتني من الدور الأول؟
طبيب الفريق شخص حالتك إنه شد يعني إصابة عضلية مش لاقدر الله جراحة أو حاجة كبيرة تستدعي سفرك(زي الشناوي مثلا اللي عنده خلع في الكتف) وعلاج الشد ده مش محتاج سفر لانجلترا ولا محتاج أجهزة متقدمة وبعدين حتى لو محتاج فليفربول اللي بيبعت لك طيارة خاصة لتنقلاتك مش هتغلب يعني إنها تبعت لك فريق طبي ومستشفى كمان علشان تعالجك
آخر سؤال هو ليه إتحاد الكرة والمنظومة كلها مسلمة لصلاح كده؟ يعني في الوقت اللي المنتخب المغربي بيرفض نفس الطلب بسفر نصير مزراوي للعلاج في ألمانيا بنلاقي ليفربول مبتكلفش نفسها أصلا إنها تطلب من المنتخب المصري سفر صلاح بل بتعلن خلاص إن صلاح مسافر وده طبعا بالتنسيق مع صلاح نفسه بعيدا عن الإتحاد المصري
ونروح بعيد ليه مانفس الإتحاد بنفس الأشخاص رفض قبل كده في 𝟐𝟎𝟐𝟏 سفر محمد الشناوي لاستكمال علاجه في مصر رغم إن البطولة كانت انتهت بالنسبة له
كل يوم بتزداد الفجوة بين صلاح والجمهور المصري والمشكلة إنك تحس إن صلاح أصلاً مش فارق معاه غضب الجمهور ولا كأنه شايفه
