الأهلي وسموحه .. نجم وتعليق
بما إن المباراه مساعدتناش نتكلم فني لأن الأخطاء كتير والحاله الفنيه بشكل عام غير مرضيه تماما .
عشان كده حابب أعلق علي كل لاعب والجهاز الفني علي حده بكلمات أو جمل بسيطه توصف المشهد وتقربنا من واقع المستوي الفني للمباراه :-
١- الشناوي :- مينفعش وإنت في فورمه عاليه وماشي بشكل كويس تعمل أخطاء ساذجه تبوظ منظرك وده بشكل عام وأمام سموحه بشكل خاص لأن لو تم إستغلال خطأك المرادي زي هدف حسام حسن سابقا كانت هتبقي كارثه.
٢- أكرم توفيق :- مقدرش أتكلم عليك من ناحية الرجوله والروح العاليه لأنك فيها نمبر وان ولكن علي المستوي الفني النهارده أقل كتييير من ماتش صن داونز وإحنا محتاجينك دايما في أفضل حالاتك.
٣- رامي ربيعه :- بشكل عام بتقدم مستويات متقاربه في معظم المباريات لكن مشكلة الإندفاع اللي بتصل إلي حد التهور يجب التخلص منها .
٤- محمد عبدالمنعم :- قدراتك وإمكانياتك الفنيه محدش يختلف عليها بس التعبير عنها مش بالترقيص أو الثقه المفرطه اللي تصل إلي حد التعالي عشان كده مش هقولك غير حاجه واحده اللعب السهل لا عيب ولا حرام .
٥- علي معلول :- رغم قناعاتي بإن كولر غير تفكيرنا في نظرية الروتيشن والتدوير وإنه بيديرها بشكل عام جيد جدا إلا إنك اللاعب الوحيد في الفريق اللي دايما بختلف معاه في عملية أدارة مشاركتك في المباريات والدقايق اللي بتلعبها .
٦- مروان عطيه :- حظك وحش إنك أديت مباراه كويسه في ظل وقوع الفريق فنيا وبعتبرك النهارده أفضل لاعب في الفريق ومؤخرًا في تحسن ملحوظ في مستواك مقارنه ببداية الموسم بس لسه برده مش هو ده مروان اللي إحنا نعرفه .
٧- إمام عاشور :- لسه عندك أكتر من كده بكتير وتقدر تساعد الفريق وتكسبه ماتشات كتير وأخيرا كولر لعبك مركز 8 بيشتغل من قلب الملعب وبييجي من تحت مش بيلعب عالي ، أتمني بقي نشوف الإختراقات المميزه والتصويبات القويه وإحراز أهداف مع إستخدام مهاراتك الفرديه ورؤيتك المميزه للملعب في توزيع اللعب.
٨- أفشه :- دافعت عنك كتير لأني مؤمن بقدراتك ومازلت لكن التباين في مستواك الفني من مباراه لآخري بقي محير جدا بالنسبالي وبشعر وكأنك مشتت فنيا للدور اللي بتقوم بيه داخل الملعب خاصة لو لعبت مركز 8 صريح.
٩- حسين الشحات :- وديت النينچا فين يا حسين ؟!
١٠- كريم فؤاد :- لاعيب راجل جدا ومجتهد جدا وأنا مقتنع بإمكانياتك جدا بس إنتاجك الفني مش دايما بيكون علي قد مجهودك .
١١- صلاح محسن :- رغم موهبتك الواضحه هتظل لغز كبير لأنك دايما بتأكد إن صلاح محسن الأهلي أقل من صلاح محسن أي نادي آخر .
١٢- أحمد عبدالقادر :- موهبتك كبيره جدا لكن من غير عقل وشخصيه تدير الموهبه دي عمرك ما هتبقي لاعيب كبير ، ومينفعش أيا كان الموقف اللي إنت فيه وفي أي مساحه في الملعب وسواء مضغوط أو مرتاح يكون تفكيرك الأول والتاني والعاشر الترقيص وبعدين تفكر تباصي لزمايلك.
١٣- زعلوك :- لاعيب صغير لكن موهوب ومحتاج فرصه ونسب مشاركات أعلي خاصة إن ظروف مركز راس الحربه تسمح بذلك .
١٤- مارسيل كولر :- تكرار الإخطاء في مباريات كتير ده مؤشر سلبي جدا وبينم عن عدم تركيز كبير وبما إن حالة الفرقه بشكل عام سيئه يبقي المسئوليه الأكبر ترجع للجهاز الفني لعدم إعداد الفريق وتحضيره ذهنيا وفنيا ونفسيا للمبارايات بشكل مناسب ، ويظل السؤال الدائم والمتكرر أيضا وهو ليه بتأخر التغييرات والفريق مش كويس ومحتاج تغييرات وتدخل سريع منك .
١٥- أحمد سامي :- مدرب محترم يملك شخصيه قويه بشكل عام بتؤهله إنه يقود فريقه بحرفيه ودائما ما يؤدي بشخصيه فنيه جيده مع كل الفرق اللي دربها .
